不知是否因為看得外國嘅汽車節目太多，一直以來都有兩個關於汽車嘅願望希望實現的。不不不，不是要買Pagani Zonda R或林寶和拉利，只是可以把車泊正在家門前，和開着自己的車去穿州過省自駕遊。
買車很大程度係為了方便接載家人和購物，把車泊在自己家門前係幾咁理所當然。想想去完超級市場，回家後打開車尾箱，就拎入屋；或者星期日拎部單車出嚟，放上車即刻去郊外舒展下筋骨，多好！偏偏香港就差唔多無呢個可能。家住石硤尾，位處地鐵站上蓋理應方便到極點，屋邨停車場十二點後不准出入（無理！好多時就係因為夜歸先揸車。），租車位比屋租竟然貴近一倍。最終極當然係獨立屋底層就有車房，擺到部車之餘仲可儲多部 classic car，又可以擺一些常用汽車補品後備胎之類，自己得閒做下保養，一樂也！當然更要整到一個Men Zone，叫班豬朋狗友傾下車經，隊下啤咁，簡直就是天堂！
另外，歐美兩地嘅人一放假就開架camper或者拖架mobile home四圍去。但對一般香港人來說，開自己架車去旅行，甚至能夠在自己架車中生活一兩日，實在想也不敢想嘅一件事！我知如果要讓香港人開車去大陸，要先解決很多問題，例如保險、牌照和油費差距、左右軚不適應等問題，但大家都知道這是始終會發生的一件事，我真期待這一天嘅來臨。
