話說今埸紅牛車隊準備了新嘅頭翼應付全新嘅銀石賽道，兩位車手一人一隻。但星期六最後一節練習賽，華迪爾嘅頭翼竟然鬆脫了，最後更加爛埋。車隊之後做了最壞的一個決定，在排位賽前，將韋伯嘅頭翼拆下來給華迪爾用，而韋伯就用返舊版本。這小小動作（至少車隊認為係），令原本已經係用隊友舊車架嘅韋伯（副車架華迪爾季初用過，之後表示該車架有問題，令佢未能贏車），立即黑面。及後嘅排位賽，華迪爾最終獲得竿位，韋伯只能屈居第二位起步。傳媒當然不會錯過大做文章嘅機會，立刻報導車隊不和消息，事情火速升溫。不知是否傳媒嘅追訪令兩人心浮氣燥，在週日比賽起步時，兩人互相爭位，令華迪爾剷出賽道，跌至包尾。雖然華迪爾憑安全車出動後力追，最後也只能得第七。韋伯在此情況下贏得比賽固然開心，亦吐一口烏氣之餘亦贏埋啖氣，衝線後突然投訴咁在team radio 爆出一句：「Not bad for a no.2 driver....」，事情亦迅速白熱化！
先講華迪爾。我不知佢會唔會預咗車隊一定幫佢換頭翼，但佢之後講話「唔同人自然就有唔同意見」，我就十分認同。原因係夠官腔，拎到着數就無謂再多講。不過，成為當紅炸子雞嘅佢，呢幾場都難掩越黎越霸道嘅性格架喇（喂，佢三年前先中學畢業喎）。
韋伯雖然賽車經驗老到，但處理呢件事上，就未免顯得很不智了。首先，我覺得黑面係正常嘅，唔嬲就假。佢不智在於將所有不滿搬上枱面，大講特講！佢講嘅嘢，有兩句我認為可以演譯一下。第一句：「如果我早知係要我做二號車手，我當初就唔會續約紅牛。」作為未拎過冠軍嘅三十四歲車手，難得揸住架咁好嘅車，當然想拎番個世界冠軍，名留青史。之不過已經三十四歲，人家華迪爾才二十三，要長遠發展下去，當然會偏重年輕有潛力嗰個啦，簽約時無諗過呢點嗎？況且隊友上季表現確實較為優勝，亦難怪車隊策略上有少少偏心。第二句「Not bad foor a no.2 driver」我認為比第一句更加蠢！第一，如果車隊真係有偏心情況，講咗亦無補於事，只會令車隊分裂同更加對立。第二，紅牛唔係無車手可用，一個唔該換走你都仲得（不過我都信機會好細）。第三，俾更加多機會傳媒做故仔，何必搞到全隊都要分心呢！
**出blog前最新消息話韋伯已經唔再嬲同不滿喎，我就唔信係真喇．．．
